ከሶማሌ ክልል የተፈናቀሉ የኦሮሞ ተወላጆች እየታሰሩ መሆኑን ተናገሩ። DW (Amharic)

ከሶማሌ ክልል የተፈናቀሉ የኦሮሞ ተወላጆች በርካታ ወንዶች እየታሰሩ መሆኑን ተናገሩ።  እንስት እና ሕጻናት ጨምሮ ከክልሉ የተፈናቀሉ በመቶዎች የሚቆጠሩ ሰዎች በጭናክሰን ከተማ ሁለት ትምህርት ቤቶች እና ከዚህ ቀደም የጦር ካምፕ ከነበረ መጠለያ ውስጥ ሰፍረዋል። ከጅግጅጋ ከተማ የተፈናቀለች አንዲት እንስት ኦሮሞ በመሆናቸው ብቻ ተለይተው ሰዎች በአሰቃቂ ሁኔታ መገደላቸውን እንዲሁም መባረራቸውን ተናግራለች። ለአመታት ሰርተው ያፈሩት ንብረት እንደተወሰደባቸውም ጨምራ ተናግራለች። ከጭናክሰን በተጨማሪ ከሶማሌ ክልል የተፈናቀሉ ሰዎች ወደ ጉርሱም በመትመም ላይ መሆናቸውን በግብርና ሥራ የሚተዳደሩ የአካባቢው ነዋሪ ተናግረዋል። ላለፉት ሁለት ቀናት ከጅግጅጋ እና ውጫሌ አካባቢ የተፈናቀሉ ወደ 50 የሚደርሱ ሰዎች ከቀያቸው መድረሳቸውን ተናግረዋል። የአይን እማኙ ወደ 2,000 ገደማ ሰዎች መንገድ ላይ መሆናቸው ተነግሮናል ብለዋል። የሶማሌ ክልል የፕሬዝዳንት ጽህፈት ቤትን ስለጉዳዩ ጠይቀን ምላሽ አልስጥም ብሏል። (ፎቶ: ፋይል)